Mi fydd Tŷ’r Cwmnïau yn cyflwyno proses gwiriad hunaniaeth newydd i helpu i atal y rhai sy’n dymuno defnyddio cwmnïau at ddibenion anghyfreithlon.
Bydd angen i unrhyw un sy’n sefydlu, rhedeg, yn berchen neu’n rheoli cwmni yn y DU wirio eu hunaniaeth i brofi mai nhw yw’r person y maent yn honni ei fod. Darllenwch y canllawiau ar wirio eich hunaniaeth ar gyfer Ty’r Cwmnïau.
Rydym yn cyflwyno gwiriad hunaniaeth mewn dull graddol.
Pwy sydd angen gwirio eu hunaniaeth
O’r 8 Ebrill 2025, gall unigolion wirio eu hunaniaeth yn wirfoddol. Gallwch wirio’n uniongyrchol gyda Thŷ’r Cwmnïau trwy GOV.UK One Login, neu drwy Ddarparwr Gwasanaeth Corfforaethol Awdurdodedig (DGCA).
Yn y dyfodol, bydd gwiriad hunaniaeth yn dod yn orfodol ar gyfer:
- cyfarwyddwyr newydd a phobl â rheolaeth arwyddocaol (PRhA)
- cyfarwyddwyr presennol a PRhA
- unrhyw un sy’n gweithredu ar ran cwmni
Bydd gwiriad hunaniaeth hefyd yn berthnasol i fathau eraill o gofrestriad. Er enghraifft, bydd angen i unrhyw aelodau partneriaeth atebolrwydd cyfyngedig (PAC) wirio eu hunaniaeth hefyd.
Gwirio eich hunaniaeth yn uniongyrchol gyda Thŷ’r Cwmnïau gan ddefnyddio GOV.UK One Login
Gallwch ddefnyddio GOV.UK One Login i wirio eich hunaniaeth gan ddefnyddio dogfennau adnabod, fel pasbort.
Gwirio eich hunaniaeth drwy Darparwyr Gwasanaeth Corfforaethol Awdurdodedig
Mae Darparwyr Gwasanaeth Corfforaethol Awdurdodedig (DGCA) yn unigolion neu sefydliadau sy’n ymgymryd â gweithgarwch atal gwyngalchu arian (AML), fel:
- asiantau ffurfio cwmnïau
- cyfreithwyr
- cyfrifwyr
- ysgrifenyddion siartredig a gweithwyr llywodraethu proffesiynol
O’r 18 Mawrth 2025, gall cwmnïau dan oruchwyliaeth atal gwyngalchu arian ac unig fasnachwyr wneud cais i ddod yn DGCA. Bydd DGCA hefyd yn cael eu galw’n asiantau awdurdodedig.
Rhaid i wiriadau gwiriad hunaniaeth a gynhelir gan DGCA fodloni’r un lefel o sicrwydd â’r rhai sy’n gwirio’n uniongyrchol gyda Thŷ’r Cwmnïau.
Darllenwch fwy am Ddarparwyr Gwasanaeth Corfforaethol Awdurdodedig.
Os nad ydych yn cydymffurfio â gofynion gwiriad hunaniaeth ar amser, byddwch yn cyflawni trosedd. Bydd amrywiaeth o ganlyniadau, gan gynnwys cosb ariannol. Ni fyddwch yn gallu gwneud unrhyw ffeilio ar gyfer eich cwmni neu ddechrau cwmni newydd.