Gwiriad hunaniaeth
Mi fydd Tŷ’r Cwmnïau yn cyflwyno proses gwiriad hunaniaeth newydd i helpu i atal y rhai sy’n dymuno defnyddio cwmnïau at ddibenion anghyfreithlon.
Bydd angen i unrhyw un sy’n sefydlu, rhedeg, yn berchen neu’n rheoli cwmni yn y DU wirio eu hunaniaeth i brofi mai nhw yw’r person y maent yn honni ei fod.
Dros y misoedd nesaf, byddwn yn egluro pryd y bydd y newidiadau hyn yn dod i rym a sut y bydd y broses wirio hunaniaeth yn gweithio. Nid oes angen i chi wneud unrhyw beth eto.
Pwy sydd angen gwirio eu hunaniaeth
Ar gyfer cwmnïau newydd, bydd angen i bob cyfarwyddwr a pherson sydd â rheolaeth arwyddocaol (PRhA) gwblhau gwiriad hunaniaeth.
Bydd gwiriad hunaniaeth hefyd yn berthnasol i fathau eraill o gofrestru. Er enghraifft, bydd angen i unrhyw aelodau partneriaeth atebolrwydd cyfyngedig (PAC) wirio eu hunaniaeth hefyd.
Ar gyfer cwmnïau presennol, bydd gan bob cyfarwyddwr (neu gyfwerth) a PRhA gyfnod pontio i wirio eu hunaniaeth gyda Thŷ’r Cwmnïau.
Bydd angen i unrhyw un sy’n gweithredu ar ran cwmni wirio eu hunaniaeth cyn y gallant ffeilio gwybodaeth gyda ni. Gallwch wirio’n uniongyrchol gyda Thŷ’r Cwmnïau, neu drwy asiant awdurdodedig.
Gwirio eich hunaniaeth yn uniongyrchol gyda Thŷ’r Cwmnïau
Gallwch ddefnyddio GOV.UK One Login i wirio eich hunaniaeth gan ddefnyddio dogfennau adnabod, fel pasbort. Bydd amrywiaeth o gymorth a gwasanaethau ar gael i’ch helpu i gwblhau’r broses hon.
Gwirio eich hunaniaeth drwy Darparwyr Gwasanaeth Corfforaethol Awdurdodedig
Mae Darparwyr Gwasanaeth Corfforaethol Awdurdodedig (ACSP) yn unigolion neu sefydliadau sy’n ymgymryd â gweithgarwch atal gwyngalchu arian (AML), fel:
- asiantau ffurfio cwmnïau
- cyfreithwyr
- cyfrifwyr
- ysgrifenyddion siartredig a gweithwyr llywodraethu proffesiynol
Mae gan asiantau awdurdodedig eisoes ddyletswydd i gynnal gwiriadau diwydrwydd dyladwy ar eu holl gleientiaid. Bydd proses gwiriad hunaniaeth Tŷ’r Cwmnïau yn adeiladu ar y gwiriadau presennol hyn.
Rhaid i wiriadau gwiriad hunaniaeth gan asiantau awdurdodedig fodloni’r un lefel o sicrwydd â’r rhai sy’n gwirio’n uniongyrchol gyda Thŷ’r Cwmnïau.
Byddwn yn cyhoeddi canllawiau manwl ar gyfer asiantau awdurdodedig ar y gofynion gwiriad hunaniaeth hyn. Darllenwch fwy am Ddarparwyr Gwasanaeth Corfforaethol Awdurdodedig.